Missir húsið sitt þrátt fyrir loforð ríkisstjórnarinnar

Það er ekkert að marka loforð ríkisstjórnarinnar segir kona sem missti húsið sitt á nauðungaruppboði og fær hálfan mánuð til að rýma fasteignina.

Forsaga málsins er sú að þriðji aðili gerði kröfu upp á eina milljón á fasteign Huldu Skjaldardóttur. Hún hafði verið í sjálfstæðum atvinnurekstri og er deilan sprottin upp frá því. Á húseign Huldu hvíldi um 14 milljóna króna lán frá Glitni og fimm til viðbótar frá öðrum lánveitendum og kröfuhöfum. Þann 7. Janúar var uppboð á húseigninni þar sem Nýi Glitnir átti hæsta boð, eða 1 milljón.

Hulda fékk bréf sent frá Nýja Glitni síðasta laugardag þar sem þess er krafist að hún rými eignina eigi síðar en 15. febrúar. Henni er einnig bent á að bankinn geti krafist aðstoðar sýslumanns til rýmingar á eigninni gerist þess þörf.

Þrátt fyrir ítrekuð loforð ríkisstjórnarinnar að slá skjaldborg um heimilin og að reynt yrði að gera fólki kleift að búa áfram í húsum sínum sem það hefur misst stefnir allt í að Hulda verði heimilislaus.

Viðskiptaráðherra baðst undan viðtali en upplýsingafulltrúi Viðskiptaráðuneytisins sagði í samtali við fréttastofu að án þess að afstaða væri tekin til einstakra skuldara, virtist þetta mál vera þannig vaxið að ríkisbankarnir séu ekki að fara eftir tilmælum ríkisstjórnarinnar. Ráðuneytið muni skoða þetta mál.