Heilbrigðisstofnun Suðurnesja ekki að fella niður læknisþjónustu

Sigurjón Kristinsson, framkvæmdastjóri lækninga á heilsugæslu Heilbrigðisstofnunar Suðurnesja, segir að ekki sé verið að fella niður læknisþjónustu við börn með geðraskanir.

Fréttastofa greindi frá því í dag að sú ákvörðun hefði verið tekin á dögunum að skera niður þjónustu fyrir börn með geðraskanir á Suðurnesjum. Börn á Suðurnesjum, sem þjáðust af þunglyndi, ofvirkni, áráttuhegðun og þess háttar fengu því ekki lengur þjónustu við hæfi í sinni heimabyggð.

Samkvæmt upplýsingum frá Sigurjóni felst breytingin sem um ræðir í því að læknar sem hafa sinnt þjónustu við börnin munu verða ráðnir sem launþegar við stofnunina og stöðuhlutfall þeirra aukið eftir því. Áður hafi þeir hins vegar starfað sem verktakar. Sigurjón segir að ekki sé ljóst hvort þessi breyting verði til frambúðar. Það ráðist meðal annars af afstöðu heilbrigðisráðuneytis og stöðu stofnunarinnar í víðara samhengi. En starfsemin verði áfram til staðar og aldrei hafi staðið til að leggja hana niður.

Sigurjón segir að Heilbrigðisstofnunin hafi lagt sig fram um að mæta þörfum þeirra barna sem hafi átt við sálfélagsleg og geðræn vandamál að stríða. Við stofnunina starfi bæði sálfræðingar og félagsráðgjafi sérstaklega í þessu verkefni auk barnalækna, heilsugæslulæknis og starfsfólks heilsugæslunnar. Hins vegar hafi sveitarfélögin á Suðurnesjum fyrir utan Grindavík dregið sig út úr því samstarfi tímabundið vegna rekstrarerfiðleika.