Geðfötluðum börnum úthýst á Suðurnesjum

„Landsvæði sem var til fyrirmyndar með þessa þjónustu hefur verið sprengt aftur á steinöld," segir Gylfi Jón Gylfason, yfirsálfræðingur hjá Fræðsluskrifstofu Reykjanesbæjar, en sú ákvörðun var tekin á dögunum að skera niður þjónustu fyrir börn með geðraskanir. Gylfi segir að þjónustan hafi náð til nær allra nágrannabyggða á suðurnesjum og þjónustaði börn með margvísislega geðraskanir svo sem þunglyndi, ofvirkni, áráttuhegðun og svo framvegis.

Gylfi er gríðarlega ósáttur við ákvörðunina en það var Heilbrigðisstofnun Suðurnesja (HHS) sem þjónustaði börnin. Vegna víðtæks niðurskurðar í heilbrigðiskerfinu var ákveðið að skera niður þjónustu við börn með geðfatlanir þar sem ekki hafa náðst samningar um greiðslur til stofnunarinnar.

„Þetta er kreppuákvörðun," segir Gylfi sem segir þróunina ólýsanlega sorglega. Hann bendir á að áður en þjónustunni var upprunalega komið á þá þurftu börn á Suðurnesjum að leita, nær undantekningalaust, á Barna- og unglingageðdeild Landspítalans á höfuðborgarsvæðinu.

„Við höfum átt mjög gott samstarf við heilbrigðisstofnunina varðandi börn sem eru til að mynda með þunglyndi, kvíða eða áráttur og öll gátu þau fengið meðferð í heimabænum. Núna hefur það verið strikað út með einu pennastriki," segir Gylfi dapur í bragði, en hann ásamt fleiri sálfræðingum og hagsmunaaðilum, hafa sent erindi bæði til nýs heilbrigðisráðherra, Ögmundar Jónassonar, sem og bæjarstjóra á Suðurnesjum.

„Við vitum ekki hvað tekur núna við né hvert börnin þurfi að leita sér aðstoðar," segir Gylfi sem kvíðir fyrir afleiðingunum, sem hann telur að verði víðtækar. Hann bendir á að börn með geðraskanir hafi talsverð áhrif á sitt nánasta umhverfi, sé högum þeirra breytt með þessum hætti þá geti þær afleiðingar orðið neikvæðar.

Sjálfur segist Gylfi hafa fullan skilning á því að það þurfi að skera niður á tímum sem þessum. Hann spyr hinsvegar á móti hvort þarna sé um raunverulegan sparnað að ræða, börn með geðraskanir séu áætluð um fimm prósent á Suðurnesjum, sá fjöldi bætist nú á álagið á þjónustu við börn með geðraskanir á höfuðborgarsvæðinu.

„Álagið er neikvætt og þýðir bara eitt - biðlistar," segir Gylfi að lokum og vonar einlægt að niðurskurðurinn verði endurskoðaður.