Íhuga að draga úr sjósókn

Stóru útgerðarfélögin í landinu íhuga nú að draga úr sjósókn vegna mikillar birgðasöfnunar á sjávarafurðum, lækkandi verðs á heimsmarkaði og hríðlækkandi verðs á innlendum fiskmörkuðum.

Spurn eftir dýrustu afurðunum hefur dregist verulega saman vegna kreppunnar og kaupendur knýja stöðugt fram meiri verðlækkun á því litla sem þeir kaupa. Þá hafa norsk stjórnvöld ákveðið að strykja þarlend útvegsfyrirtæki um miklar fjárhæðir til að bregðast við þessu ástandi, en Norðmenn selja sínar fiskafurðir á sömu mörkuðum og við.

Til viðbótar þessu eru Norðmenn og Rússar aftur byrjaðir loðnuveiðar í Barentshafi eftir nokkurra ára veiðibann og ætla Rússar að beita verndaraðgerðum til að rússneskar loðnuafurðir hafi forgang á innanlandsmarkaði þeirra, sem hefur verið mikilvægur markaður fyrir íslenskar loðnuafurðir síðustu árin.