Björn tekur undir orð Davíðs

Björn Bjarnason tekur undir gagnrýni Davíðs Oddssonar seðlabankastjóra á bréf sem Jóhanna Sigurðardóttir forsætisráðherra sendi seðlabankastjórunum með óskum um að þeir víki sæti.

„Bréf af þessu tagi með lítt dulbúnum hótunum til embættismanna er einsdæmi, ekki eingöngu hér á landi, heldur einnig um allan hinn vestræna heim. Lög sem eiga að tryggja sjálfstæði seðlabanka og forða pólitískri aðför að seðlabankastjórninni hafa nú verið þverbrotin. Ábyrgð ráðherrans er því mikil," segir Davíð réttilega að mati Björns.

Orðum sínum til stuðnings bendir Björn á þingræðu þar sem hann sagðist ekki minnast þess að Jóhanna Sigurðardóttir forsætisráðherra hafi gert athugasemdir við ákvarðanir Seðlabanka Íslands í peningamálum, á meðan hann sat með henni í ríkisstjórn.