Ráðherra segir OR ekki bera meiri lán

Svandís Svavarsdóttir umhverfisráðherra segir fráleitt að láta sem úrskurður hennar um Suðvesturlínu standi álveri í Helguvík fyrir þrifum. Mun stærri ljón séu í veginum fyrir álversframkvæmdum en sá úrskurður sem þýði fárra vikna töf á línunni. Til að mynda sé spurningum ósvarað um orkuöflun.

„Ég spyr, er Norðurál tilbúið til að fara í verkefnið ef það verður ekki nema fyrsti áfangi, eða ef það verður ekki nema tveir áfangar? Er það skilyrði Norðuráls að verkefnið fari alla leið? Fyrir því er einfaldlega ekki til orka," segir Svandís.

Eins og Fréttablaðið greindi frá í gær er óvissa um þrjátíu milljarða króna lán Evrópska fjárfestingarbankans til Orkuveitu Reykjavíkur (OR). Fáist lánið verður Hellisheiðarvirkjun kláruð, en ákvarðanir um byggingu Hverahlíðarvirkjunar bíða þar til lokafjármögnun þess verkefnis liggur fyrir.

Svandís segir Orkuveituna mjög skuldsetta og lán til frágangs Hellisheiðarvirkjunar sé nógu stór biti. „Ef taka á lán fyrir Hverahlíðarvirkjun í ofanálag er ekki að spyrja að leikslokum. Fyrirtækið er í járnum eins og öll orkufyrirtæki á Íslandi. Það er tómt mál að tala um að fara í gríðarlegar skuldbindingar umfram það sem þegar er orðið. Fara verður mjög varlega í þeim efnum." Lagt hafi verið upp í Helguvíkurverkefnið með gleraugum 2007-hugsunarháttar.

Svandís segir loftslagsmál stærstu pólitísku viðfangsefni samtímans. Efnahagskreppan, sem nú dynur yfir, sé ekki af viðlíka skala og þau vandamál sem loftslagsmálin eru.

- kóp /