Kærunefnd stöðvar Vodafone-samning

„Það er ánægjulegt að kærunefndin skuli hafa stöðvað þetta ferli því það var klúður í uppsiglingu," segir Sævar Freyr Þráinsson, forstjóri Símans, um þá ákvörðun kærunefndar útboðsmála að stöðva gerð samninga við Vodafone um símaþjónustu fyrir Landspítalann.

Eins og kom fram í Fréttablaðinu 4. júní kærði Síminn þá ákvörðunRíkiskaupa að semja við Vodafone fjarskiptaþjónustu fyrir Landspítalann. Vodafone bauð hagstæðari kjör í útboði í mars, eða 185 milljónir króna fyrir þriggja ára samning en Síminn bauð 227 milljónir. Síminn taldi að Vodafone uppfyllti ekki skilyrði útboðsins þar sem fyrirtækið hefði neikvæða eiginfjárstöðu.

Tilboðin áttu að renna út í maí en Ríkiskaup frestuðu samningagerðinni. Í bréfi Júlíusar S. Ólafssonar, forstjóra Ríkiskaupa, til Símans sagði að þótt tilboðsgjafi hefði neikvætt eigið fé þegar hann skilaði inn tilboði mætti gera undanþágu ef eigið féð væri jákvætt þegar kæmi að undirritun samnings - sem í þessu tilviki væri stefnt að í byrjun júlí. Ríkisbankarnir Landsbankinn, Straumur og Íslandsbanki eiga nú samtals tvo þriðju hluta í Teymi, móður­félagi Vodafone.

Kærunefnd útboðsmála stöðvaði í fyrradag samningana við Vodafone þar til hún tekur endanlega afstöðu til kæru Símans. Nefndin segir það meginreglu útboðsréttar að breyta ekki í meginatriðum skilmálum útboðs eftir að tilboðum er skilað inn því það raski jafnvægi milli bjóðenda.

„Mögulega má gera undantekningar frá þessu ef allir þátttakendur útboðsins samþykkja eða ef málefnalegar ástæður réttlæta breytinguna," segir nefndin og bendir á að ekki hafi allir tilboðagjafar samþykkt að framlengja tilboðin. „Þá fær kærunefnd ekki séð að málefnalegar ástæður réttlæti að framlengja gildistíma tilboða," segir nefndin, sem kveður „verulegar líkur" á að Ríkiskaup hafi brotið gegn lögum.

Hrannar Pétursson, forstöðumaður almennatengsla hjá Vodafone, sagði ákvörðun kærunefndar útboðsmála enn ekki hafa borist fyrirtækinu. Því gæti hann að svo stöddu ekki lýst afstöðu Vodafone til niðurstöðu nefndarinnar.