Ánægður með að Jóhanna sé fyrsta konan

Ólafur Ragnar Grímsson forseti Íslands lýsti yfir sérstakri ánægju sinni með að Jóhanna Sigurðardóttir yrði fyrsti kvenforsætisráðherra þjóðarinnar. Þetta sagði Ólafur eftir fund sinn með Jóhönnu á Bessastöðum fyrir stundu. Hann sagði þetta ekki einungis vera merkilegan atburð í sögu þjóðarinnar, heldur einnig á heimsvísu. Hann sagði tíðindi dagsins ákveðinn sigur fyrir jafnréttisbaráttuna hér á landi.

„Þótt forseti eigi í sjálfu sér ekki að taka afstöðu til einstrakra flokka eða einstaklinga langar mig að lýsa yfir sérstakri ánægju með þá ákvörðun mína í dag að fela Jóhönnu Sigurðardóttur þetta umboð. Þar með verður hún fyrst íslenskra kvenna til þess að verða forsætisráðherra íslenska lýðveldisins."

Hann sagði síðan að þau Jóhanna hefðu rætt helstu áhersluatriði væntanlegrar ríkisstjórnar og skipan ráðherra og ráðuneyta. Hann sagðist óska Jóhönnu góðs gengis í hennar störfum.