Fresta fundi til að fylgjast með Jóhönnu

Samfylkingarmenn í Reykjavík hyggjast fresta fyrirhuguðum félagsfundi sínum sem átti að fara fram á morgun vegna stefnuræðu Jóhönnu Sigurðardóttur forsætisráðherra.

Í orðsendingu sem Ásgeir Beinteinsson, formaður félagsins, sendi félögum sínum segir að á morgun verði sá sögulegi viðburður að Jóhanna Sigurðardóttir forsætisráðherra flytur stefnuræðu sína á Alþingi. Í framhaldi af ræðunni verði umræður. Stjórn félagsins finnist ekki rétt að bjóða einnig upp á félagsfund á sama tíma.

Stjórnin hvetji félagsmenn til að fylgjast með þessum sögulegu tímamótum í stjórnmálasögu Íslands. Gert sé ráð fyrir að ræðan verði flutt klukkan tíu miðvikudagskvöldið 4. febrúar.