Líkur á vorkosningum aukast

Meirihluti þingflokks Samfylkingar hefur, ýmist nú eða fyrir áramót, sagst vilja kosningar í vor. Um leið verða efasemdaraddir um núverandi stjórnarsamstarf háværari meðal þingmanna flokksins.

Ágúst Ólafur Ágústsson, varaformaður flokksins, sagðist í gær vilja kjósa í vor. „Kosningar eru nauðsynlegur liður í þeirri uppbyggingu sem nú fer í hönd," segir Ágúst.

Stjórnarsamstarfið var rætt á þingflokksfundi flokksins í gær. Lúðvík Bergvinsson sem er formaður þingflokksins segir að taka eigi hugmyndir varaformannsins um vorkosningar til skoðunar. „Það var mikill einhugur um það að vinna þjóðinni eins vel og nokkur er kostur, hlusta á hana og fylgja hennar ráðleggingum."

Össur Skarphéðinsson iðnaðarráðherra segist skilja kröfu almennings um kosningar. „Ríkisstjórnin hefur unnið sér inn reiði almennings með því að standa ekki við þær hreinsunaraðgerðir sem menn hafa viljað; til dæmis hvað varðar Seðlabankann og þá sem bera ábyrgð á bankahruninu."

Þingmennirnir Karl V. Matthíasson og Guðbjartur Hannesson sögðust í samtali við Fréttablaðið vera opnir fyrir kosningum í vor. Áður höfðu Björgvin G. Sigurðsson, Þórunn Sveinbjarnardóttir, Katrín Júlíusdóttir, Steinunn Valdís Óskarsdóttir og Ellert B. Schram öll tekið í svipaðan streng. - kóp, ss