Mótmæli boðuð fyrir utan Gallerí Fold

Samband Íslenskra Myndlistarmanna (SÍM) boðar til mótmæla við Gallerí Fold á Rauðarárstíg klukkan 18:00 í dag.

Ástæðan fyrir mótmælunum er uppboð á vegum Gallerí Foldar en SÍM vill meina að galleríið innheimti svokölluð fylgiréttargjöld af seldum verkum en gjöldin skila sér ekki áfram til listamanna.

SÍM heldur því fram að þetta hafi viðgengist árum saman, „og nú er mál að linni," segir í tilkynningu frá SÍM.

Við endursölu myndverka á listmunauppboðum eða hjá öðrum listaverkasölum leggst fylgiréttargjald ofan á söluverð sem rennur til viðkomandi höfundarétthafa.

Gjald þetta gefur höfundi hlutdeild í markaðsverði vegna endursölu á verkum hans.

Þá kemur ennfremur fram í tilkynningu frá SÍM að Gallerí Fold hafi verið stefnt fyrir Héraðsdóm Reykjavíkur vegna meintra vanskila á fylgiréttargjöldum en stefnufjárhæð nemur um það bil 21 milljón króna.