Fyrrum eigendur kærðir fyrir að stela innréttingum

Tvær kærur hafa borist til lögreglunnar á Selfossi vegna eignaspjalla og undanskota innréttinga sem menn hafa rifið niður í íbúðum eða fyrirtækjum sem þeir kærðu höfðu misst á uppboði.

Samkvæmt lögreglunni þá felast brotin í því að hinir kærðu rýra verðgildi fasteignanna með skemmdum og undanskoti naglfastra innréttinga sem verður til þess að lánadrottnar fái ekki greiðslu af þeim.

Af öðrum málum sem komust til kasta lögreglunnar á Selfossi var meðal annars innbrot í sumarbústað við Holtabyggð í Hrunamannahreppi. þaðan var stolið áfengi, heimabíói, leikjatölvu, geisladiskum og ýmsum heimilistækjum.

Svo vill til að ekki fyrir löngu var brotist inn í þennan sama bústað. Þá náðust þjófarnir og eigandi fékk hluti sína til baka en nokkrir þeirra töpuðust aftur í þessu innbroti.

Þá eru tveir karlmenn og kona grunuð um að hafa á mánudaginn síðasta stolið varningi úr ferðamannaversluninni á Geysi í Haukadal fyrir um nærri 400 þúsund krónur.

Þjófnaðurinn uppgötvaðist er starfsmenn fundu notaðan fatnað inni á snyrtiherbergi verslunarinnar. Við skoðun á eftirlitsmyndavélum féll grunur á þessa þrjá aðila. Borin hafa verið kennsl á karlmennina sem eru grunaðir um sams konar hegðun í mörgum verslunum á höfuðborgarsvæðinu.