Lögguníðingarnir ákærðir fyrir árásina í Árbænum

Ákæra hefur verið gefin út á hendur átta mönnum sem réðust á tvo lögreglumenn við skyldustörf í Hraunbæ í Árbæ í október á síðasta ári. Alls voru tólf handteknir vegna málsins á sínum tíma en árásin var með öllu tilefnislaus.

Fréttablaðið sagði frá því á sínum tíma að mennirnir væru allir meðlimir í þekktu gengi filipseyinga en lögregluþjónarnir, karl og kona, komu í samkvæmi þar sem kvartað hafði verið undan hávaða.

Einn mannanna er ákærður fyrir að hafa rifið í axlir lögregluþjóns á bílastæði fyrir utan samkvæmið þannig að lögreglueinkenni á jakka hans rifnuðu af. Þá eru allir mennirnir ákærðir fyrir að hafa í sameiningu veist að lögreglumönnunum með hnefahöggum í stigagangi hússins auk þess sem einn þeirra tók annan lögregluþjóninn hálstaki og sparkaði annar í hnakka hins.

Afleiðingar af árásinni urðu þær að annar lögregluþjónninn hlaut fjölmarga áverka á höfði, þar með talið opin sár aftan til á höfði, blæðingu inn á augnslímu utanvert á vinstra auga, hálstognun í hnakka og brot upp úr glerungi tveggja tanna. Hinn lögregluþjónninn hlaut mar og bólgu yfir vinstra gagnauga og roða í hársverði.

Þess er krafist að mennirnir verði dæmdir til refsingar og til greiðslu alls sakarkostnaðar. Málið var þingfest í héraðsdómi Reykjavíkur í morgun en það er Ríkissaksóknari sem gefur út ákæruna.