Dóttir Helgu Völu handtekin

17 ára gömul dóttir Helgu Völu Helgadóttur fjölmiðlakonu og laganema er ein þeirra sem handteknir voru við alþingishúsið fyrr í dag. Hún segir dótturina sakhæfa en þar sem hún sé ekki orðin lögráða verði hún að hafa foreldri eða barnaverndaraðila hjá sér.

„Ég er alveg brjáluð, ég veit ekki hvað er verið að gera við barnið mitt þarna niðri," sagði Helga Vala í samtali við fréttastofu fyrir stundu.

Dóttirin er stödd niðri í bílakjallara hússins þar sem lögreglan heldur þeim handteknu. Rúmlega tíu manns voru handteknir í upphafi mótmælanna. Til að byrja með lá fólkið úti í horni alþingisgarðsins í um tvo klukkutíma að sögn Helgu Völu áður en þau voru flutt inn í þinghúsið.

„Ég hringdi síðan í nokkra þingmenn sem ég þekki og krafðist þess að þau yrðu tekin inn," segir Helga Vala nokkuð áhyggjufull.

„Ég er margoft búin að biðja um að fá að fara þarna inn. Ég er hennar forsjáraðili og þeir mega ekki halda henni svona," segir Helga Vala.