Ísafjörður: Drukkin kona féll fimm metra í blómabeð

Lögreglan á Ísafirði var kölluð til klukkan átta nú í morgun vegna konu sem virtist vera að fara sér að voða, en hún var komin upp á húsþak í miðbænum. Lögreglumenn mættu samstundis á vettvang og reyndu að ná sambandi við konuna sem var undir miklum áhrifum áfengis.

Það bar ekki árangur því konan tók sig skyndilega til og lét sig falla fram af þakinu rúma fimm metra til jarðar. Svo vel vildi til að konan lenti í blómabeði og varð ekki meint af fallinu. Lögregla fór með konuna á sjúkrahús til aðhlynningar, en þegar ekkert reyndist ama að henni kvaddi hún lögreglumennina og rölti sem leið lá heim til sín.