Vilja lána í Vaðlaheiðargöng, Suðurlandsveg og samgöngumiðstöð

Fulltrúar stærsta lífeyrissjóðs Norðurlands og annarra fjárfesta í fjórðungnum funduðu fyrir helgi með samgönguráðherra og vegamálastjóra um að fjármagna gerð Vaðlaheiðarganga með svonefndri einkaframkvæmd.

Kristján L.Möller segir að aðrir aðilar hafi nýverið haft samband við stjórnvöld um önnur verk, breikkun Suðurlandsvegar milli Reykjavíkur og Selfoss og samgöngumiðstöð á Reykjavíkurflugvelli. Lífeyrissjóðir og aðrir virðist nú vera farnir að leita sér að verkefnum til að fjárfesta í. Fátt sé betra en samgöngumannvirki þar sem notendagjöld og annað endurgreiði lán á 10 til 25 árum.

Aðpurður hvort þetta sé bara bóla rétt fyrir kosningar segir hann svo ekki vera heldur sé raunverulegur vilji á bak við þessar hugmyndir. Hann segir unnt að hrinda einhverjum þessara verka í framkvæmd innan sex til átta mánaða, en þá verði líka aðrir aðilar að fylgja með, eins og Reykjavíkurborg að leyfa samgöngumiðstöð, en menn hafi lengi þurft að bíða eftir slíku leyfi. Ef góðar og raunhæfar tillögur komi frá norðanmönnum um Vaðalheiðargöng verði farið með það strax inn í ríkisstjórn.