Varaformaður fjárlaganefndar vill heilbrigðisstofnanir til sveitarfélaga

Kristján Þór Júlíusson, varaformaður fjárlaganefndar Alþingis, styður heilshugar þá hugmynd að færa nærþjónustu alfarið til sveitafélaganna. Þetta sagði hann á fjölmennum borgarafundi sem haldinn var á sal Fjölbrautarskóla Norðurlands-vestra nú fyrir stundu. Á fundinum voru fyrirhugaðar breytingar á heilbrigðiskerfinu ræddar.

Á héraðsfréttarvefnum Feyki kemur fram að Kristján hafi sagt að hann væri á þessari skoðun vegna eigin reynslu sem sveitarstjórnarmaður. Fundurinn var fjölmennur og voru ræðumenn sammála um að nú væri komið nóg og tími til að heimamenn spyntu við fótum.

Á borgarafundinum var samþykkt ályktun þar sem áformum heilbrigðisráðherra um að sameina Heilbrigðisstofnuni Sauðárkróki öðrum heilbrigðisstofnunum á Norðurlandi og vinnubrögð ráðherra í málinu voru átalin.