Kettir snúa heim úr áralangri útlegð

Örflögumerkingar á köttum, sem krafist er í samþykkt um kattahald í Reykjavíkurborg frá árinu 2005, hefur gefið afar góða raun og hafa fjölmargir kattaeigendur endurheimt ferfætlingana eftir langa útlegð.

„Þess eru dæmi að kettir hafi komist til eigenda sinna eftir að hafa verið týndir í tvö ár,“ segir Ómar Dabney, rekstrarfulltrúi meindýravarna Reykjavíkurborgar.

„Við heyrðum af einu slíku tilfelli fyrir nokkru en þá urðu miklir fagnaðarfundir þegar högni kom í leitirnar eftir að hafa verð týndur í tvö ár. Þetta er ekki einsdæmi og sýnir okkur það að þessar merkingar eru að virka og í raun mættu margir kattaeigendur taka sig verulega á.“

Örmerki er kubbur sem dýralæknir kemur fyrir undir húð á herðakambi kattar. Umhverfissvið heldur skrá yfir merkta ketti og þangað verða eigendur að tilkynna númer örmerkisins og nafn eiganda.

Ekki lýkur útlegð kattanna alltaf jafnvel og hjá þessum tiltekna högna en Ómar segir það mikilvægt fyrir kattaeigendur að vita um afdrif katta sinna hver sem þau eru. Nóg er að gera hjá meindýraeyði nú í sumarbyrjun, til dæmis var tilkynnt um mink á vappi hjá Rafstöðvarhúsinu við Elliðaár í gær og vonast Ómar til að sá muni fyrr en síðar komast í búr.

- jse