Viðræðum haldið áfram

Árni Stefán Jónsson, varaformaður BSRB, segir að viðræðum um samkomulag samtaka launafólks, atvinnurekenda og ríkisins um launalið opinberra starfsmanna verði haldið áfram. Viðræðurnar eru í ákveðinni óvissu eftir að Seðlabankinn tilkynnti um 1% lækkun stýrivaxta í morgun.

„Sú staða sem komin er upp núna hamlar því ekki að við freistum þess að gera kjarasamning við ríki og sveitarfélög," er haft eftir Árna Stefáni í tilkynningu frá BSRB.

Þar segir að vinnu efnahagsnefndar samningsaðila haldi þó áfram í dag og að boðaðir hafi verið fundir á morgun í viðræðunefnd sem fjallar um launalið opinberra starfsmanna.

Þótt viðræður ASÍ og SA séu í uppnámi halda viðræður um launalið kjarasamninga opinberra starfsmanna áfram. Árni Stefán segir að opinberir starfsmenn séu í talsvert annarri stöðu en ASÍ og SA. Á almenna vinnumarkaðinum snúist málið um framkvæmd kjarasamnings en opinberir starfsmenn standa frammi fyrir því að gera nýjan kjarasamning þar sem samningurinn við ríkið rann út í mars og samningur við Launanefnd sveitarfélaga rennur út í haust.