Gerð stöðugleikasáttmálans í uppnámi

„Það hefur legið fyrir að hálfu atvinnurekenda ef að þessi vaxtastefna á að vera við lýði þá muni þeir ekki með nokkru móti geta komið til móts við okkur varðandi launaliðinn. Þá er viðræðum um stöðugleikasáttmála sjálfhætt en þær eru í uppnámi núna," segir Gylfi Arnbjörnsson, forseti ASÍ, um ákvörðun peningastefnunefndar Seðlabankans um að lækka stýrivexti úr 13% í 12%.

Gylfi segir stöðuna grafalvarlega og að ákvörðun bankans sé mikil vonbrigði. „Við sjáum þetta ekki sem neinn grundvöll til að vinna út frá." Verkalýðshreyfingin hafi undanfarnar vikur reynt að gera ríkisstjórninni og þá sérstaklega Seðlabankanum grein fyrir því að með núverandi vaxtastefnu, sem búið sé að teikna upp af Alþjóðagjaldeyrissjóðnum og Seðlabankanum, stefni í mikið óefni.

Gylfi segir að viðræður aðila vinnumarkaðarins og ríkisstjórnarinnar hafi gengið ágætlega. Aftur á móti sé Seðlabankinn með ákvörðun sinni að hrekja verkalýðshreyfinguna frá samningaborðinu.

„Ríkisstjórnin hefur vissulega mannað þetta betur en við höfum séð margar ríkisstjórnir gera áður og það voru allar líkur á því að við myndum ná saman," segir Gylfi sem er ekki bjartsýnn á framhaldið. „Það eru verulegar líkur á þetta fari í sundur."

Boðað hefur verið til viðræðufundar í Karphúsinu í fyrramálið.