Bjarni Ármannsson endurgreiddi rúmar sex hundruð milljónir til skilanefndar Glitnis eftir að nefndin hótaði að leita réttar síns gagnvart Bjarna fyrir dómi. Hæstaréttardómur í máli Vilhjálms Bjarnasonar gegn fyrrverandi stjórn Glitnis gaf skilanefndinni vopn sem hún notaði gegn Bjarna.

Þær fregnir, að Bjarni Ármannsson hefði ákveðið að endurgreiða rúmar sex hundruð milljónir til skilanefndar Glitnis vegna sölu á hlutabréfum hans í bankanum, komu eins og þruma úr heiðskíru lofti. Ýmsir veltu fyrir sér hvort Bjarni gerði þetta af einskærri góðmennsku en svarið við þeirri spurningu er nei.

Ástæðan er sú að skilanefndin hótaði að leita réttar síns fyrir dómstólum og fá samningi þeim sem Bjarni gerði við fyrrverandi stjórn Glitnis um sölu á bréfum hans í bankanum á yfirverði rift.

Þetta staðfesti Árni Tómasson, formaður skilanefndar Glitnis, í samtali við fréttastofu. Hann segir að í nýföllnum hæstaréttardómi í máli Vilhjálms Bjarnasonar gegn fyrrverandi stjórn Glitnis, þar sem tekist var á um kaup bankans á hlutabréfum Bjarna, hafi komið skýrt fram að félagið sjálft gæti leitað réttar síns gagnvart skaðabóta- eða refsiábyrgð áðurnefnds gjörnings og því hafi skilanefndin ákveðið að sækja að Bjarna.

Bjarni ákvað því að semja við skilanefndina og borga sex hundruð milljónir til þess að sleppa við dómsmálið.