Endanleg ráðherraskipan liggur ekki fyrir

Þingmenn Vinstri grænna og Samfylkingarinnar funduðu í morgun með formönnum sínum til að ræða komandi stjórnarsamstarf flokkanna. Búist er við því að ný ríkisstjórn verði kynnt síðdegis á morgun eftir að flokksráð Vinstri grænna og flokksstjórn Samfylkingarinnar hafa tekið afstöðu til stjórnarsáttmálans.

Endanleg ráðherraskipan liggur ekki fyrir né hvernig ráðuneytum verður skipt milli flokkanna. Líklegt þykir að Kolbrún Halldórsdóttir og Ragna Árnadóttir hverfi úr ríkisstjórn. Einnig er óvíst hvort Ásta Ragnheiður Jóhannesdóttir haldi áfram sem félagsmálaráðherra.

Árni Páll Árnason, þingmaður Samfylkingar, og Svandís Svavarsdóttir, þingmaður Vinstri grænna, hafa verið nefnd í þeirra stað.

Þá er líklegt að ráðuneytum verði fækkað til að ná fram hagræðingu en forystumenn flokkanna þegja þunnu hljóði hvað þetta varðar.