Þúsund störf gætu bjargast

Stjórn Sambands íslenskra sveitarfélaga (SÍSF) mun reyna að ná samstöðu meðal sveitarstjórnarmanna um að laun starfsmanna verði lækkuð um fimm prósent í stað þess að segja fólki upp starfi í þeim óumflýjanlega niðurskurði sem er fram undan. Hugmyndin verður kynnt á samráðsfundi í næstu viku þar sem fjárhagsstaða sveitarfélaganna verður rædd.

„Niðurskurður, sem er óumflýjanlegur, kemur að stærstum hluta niður á starfsfólki sveitarfélaganna, enda eru laun stærstur hluti af rekstrarkostnaði. Við viljum forðast uppsagnir í lengstu lög og því viljum við veita þeirri hugmynd brautargengi að laun verði lækkuð hjá öllum starfsmönnum sveitarfélaganna í landinu um fimm prósent á móti tíu frídögum á ári," segir Halldór Halldórsson, bæjarstjóri á Ísafirði, sem er jafnframt formaður SÍFS. „Þetta er leið til sparnaðar sem gæti gert sveitarfélögunum kleift að komast hjá uppsögnum."

Hjá sveitarfélögunum vinna tæplega 20.000 manns og launakostnaður er um 80 milljarðar króna. Það þýðir fjögurra milljarða króna sparnað fyrir sveitarfélögin í landinu, gróft reiknað, og að eitt þúsund störfum yrði bjargað næðist samstaða um fimm prósent leiðina í stað uppsagna.

Halldór telur að það sé keppikefli allra í samfélaginu að verja störf fólks og bendir á að fjölmörg einkarekin fyrirtæki hafi farið þessa leið.

Hugmyndin á vettvangi sveitarfélaganna kom upphaflega frá Akureyrarbæ, en bæjarráð Ísafjarðarbæjar samþykkti jafnframt ályktun þess efnis í byrjun apríl, að leiðin komi vel til greina. Jafnframt kemur fram í bókun að mikilvægt sé að samstaða myndist meðal sveitarfélaga og við launþega um þetta samstillta átak.

„Við viljum taka þessa hugmynd, ræða hana og útfæra. Ekki fyrir einhverjar sérstakar stéttir heldur fyrir starfsmenn sveitarfélaganna almennt. Það er erfitt að útfæra þessa hugmynd þannig að hún henti 78 sveitarfélögum, en við erum að vinna í því," segir Halldór.

Samkvæmt fréttum hafa fjölmargar niðurskurðarleiðir verið ræddar á milli stjórnarflokkanna að undanförnu, enda stendur fyrir dyrum að loka 170 milljarða króna fjárlagagati á næstu þremur árum.

Ríkisstarfsmenn eru 22 þúsund talsins og samkvæmt upplýsingum frá Fjársýslu ríkisins er launakostnaður 110 milljarðar á ársgrundvelli. Fimm prósent leiðin myndi því spara ríkinu allt að 5,5 milljarða króna á ári. - shá