Peningaskortur hjá Portsmouth

Hermann Hreiðarsson og félagar í Portsmouth hafa ekki enn fengið nein laun fyrir nóvember en þetta er í annað sinn í vetur sem dráttur verður á launum hjá félaginu.

Ástæðan að þessu sinni er sögð vera trúarhátíð í Sádi Arabíu en það hlýtur að vera með frumlegri afsökunum.

Það á því ekki af liðinu og leikmönnum að ganga en Portsmouth situr þess utan á botni ensku úrvalsdeildarinnar.

Í tilkynningu frá Portsmouth í kvöld kemur fram að leikmenn fái meirihluta launa sinna á morgun en þó ekki allt sem þeir eiga inni.