Lögreglan minnir á bensínstöðvarnar

Lögreglan brýnir fyrir ökumönnum að fylla bensíntankinn og taka ekki óþarfa áhættu með því að reyna að komast frá A til B á síðustu dropunum. Slíkt getur beinlínis verið hættulegt.

„Það er heldur óskemmtileg reynsla að verða bensínlaus á miðri leið þegar farið er á milli staða. Slík tilfelli koma á borð lögreglu af og til en reynt er að greiða úr vanda fólks eins og mögulegt er," segir í tilkynningu frá lögreglunni.

„Eitt nýjasta dæmið af þessu tagi átti sér stað í Ártúnsbrekkunni á háannatíma, eða mitt í morgunumferðinni. Þar hafði ökutæki staðnæmst með tilheyrandi töfum fyrir þá sem á eftir komu. Lögreglan brást skjótt við og spurði ökumanninn hvað amaði að. Sá sagði að bíllinn væri bensínlaus og því kæmist hann hvergi. Hinn sami sagði jafnframt að honum hefði verið fullljóst að mjög lítið bensín hefði verið á bílnum en hann ákvað samt að reyna að komast í vinnuna," segir í tilkynningunni.

„Maðurinn komst reyndar í vinnuna þennan morgun en það var seint og um síðir. Hefði hann sýnt fyrirhyggju og tekið bensín í tíma hefði mátt komast hjá þessum óþægindum sem voru með öllu óþörf. Með trassaskapnum tafði hann einnig fyrir öðrum vegfarendum svo ekki sé nú minnst á slysahættuna. Ekki er hlaupið að því að fjarlægja ökutæki við þessar aðstæður og það getur beinlínis verið lífshættulegt," segir einnig.