Hafnfirðingar heimta einkaleyfi á jólaþorpi

Hafnarfjarðarbær hefur sótt um einkaleyfi á heitinu Jólaþorp og kvartað til Neytendastofu yfir fyrirhuguðum markaði samtakanna Miðborgarinnar okkar í Reykjavík.

„Eftir langa þróunarvinnu varð það niðurstaðan fyrir sjö árum að kalla okkar fyrirbæri Jólaþorp. Við erum búin að leggja ómælt fjármagn og vinnu í að byggja upp þetta vörumerki þannig að það kom okkur óþægilega á óvart þegar við heyrðum af því að það ætti að setja upp sams konar fyrirbrigði í Reykjavík og undir sama heiti," segir Gunnar Axelsson, formaður menningar- og ferðamálanefndar Hafnarfjarðar.

Gunnar segir að Reykvíkingar hafi ekki aðeins fengið nafnið að láni í Hafnarfirði. „Þar verða Grýla og Leppalúði - nákvæmlega eins og hjá okkur - og nú síðast sá ég að það höfðu bæst við álfar og huldufólk - sem er nú kannski dálítið sérhafnfirskt fyrirbæri. Og í kynningarefni þeirra er meira að segja samsvörun í orðalagi og jafnvel heilu setningarnar."

Samtökin Miðborgin okkar njóta stuðnings frá Reykjavíkurborg. Jakob Frímann Magnússon, framkvæmdastjóri Miðborgarinnar okkar, segir málið hljóta að vera misskilning og eiginlega Hafnarfjarðarbrandara. Jólaþorp hafi áður verið sett upp í Reykjavík og víða um heim í bæjum, þorpum, sveitum og borgum. Enginn geti átt einkaleyfi á orðinu jólaþorpi.

„Ég ætla ekki að spilla eigin jólaskapi né annarra með því að leiða hugann að þessu. Ég óska bara Hafnfirðingum gleðilegra jóla," segir Jakob.

Gunnar segir að málarekstur Hafnfirðinga vegna Jólaþorpsins fái flýtimeðferð enda styttist í opnun markaðanna tveggja. Á Thorsplani í Hafnarfirði hefst markaðurinn föstudaginn 4. desember en á Hljómalindarreit í Reykjavík fimmtudaginn 7. desember. - gar