Allsherjarnefnd kölluð saman á föstudag

Atli Gíslason þingmaður Vinstri grænna sagðist í samtali við Vísi í morgun vilja að allsherjarnefnd Alþingis kæmi saman og aðilar kallaðir fyrir hana. Birgir Ármannsson er formaður nefndarinnar en þar sem hann er staddur erlendis mun Ágúst Ólafur Ágústsson gegna formennsku.

Í samtali við blaðamann Vísis niður í þinghúsi fyrir stundu sagðist Ágúst ætla að kalla nefndina saman á föstudag og þannig flýta fundi hennar sem átti að vera á miðvikudag í næstu viku.

Ekki liggur þó fyrirh verjir verði kallaðir fyrir en Atli sagði í morgun að ræða ætti málið opinskátt í nefndinni og að þingmenn verði upplýstir um atburðarrásina. Hann vill að Geir Jón Þórisson yfirlögregluþjónn, Stefán Eiríksson lögreglustjóri á höfuðborgarsvæðinu, Sturla Böðvarsson forseti Alþingis, Helgi Bernódusson skrifstofustjóri Alþingis og Hörður Torfasson, talsmaður Radda fólksins verði kallaðir á fundinn.