Varaformaður Samfylkingarinnar vill kosningar í vor

,,Ástandið er grafalvarlegt og ég get sagt þér að í þinghúsinu, þá skynja allir mikla reiði almennings", segir Ágúst Ólafur Ágústsson varaformaður Samfylkingarinnar sem vill að gengið verði til kosninga í vor.

Áður hafa forystumenn Samfylkingarinnar talað fyrir kosningum en þeir hafa þó ekki nefnt nákvæma tímasetningu. Meðal þeirra eru ráðherrarnir Björgvin G. Sigurðsson og Þórunn Sveinbjarnardóttir og þingmennirnir Ellert B. Schram, Steinunn Valdís Óskarsdóttir og Katrín Júlíusdóttir.

Eðlilegt að boða til kosninga í vor

Ágúst Ólafur segir að það sé staðreynd að verulega hafi gengið á traust almennings til stjórnvalda. ,,Ég hugsa að stjórnvöld fái ekki nauðsynlegan vinnufrið fyrr en að afloknum kosningum. Mér finnst hins vegar líka mikilvægt að benda á að stjórnvöld hafa unnið mörg þörf og erfið verk á undanförnum vikum."

Aðspurður hvort að líklegt sé að gengið verði til kosninga vor segir Ágúst Ólafur að afstaða sín sé skýr. ,,Ég hygg að margir meti stöðuna á sama hátt. Hvaða stjórnmálaskoðanir sem menn aðhyllast. Eðlilegast sé að boða til kosninga og að um það sé mynduð þverpólitísk sátt."

Staða margra verri en í haust

Ágúst Ólafur segir að margt bendi til þess að reiði almennings sé að aukast og hún sé í réttu hlutfalli við þá staðreynd að staða fólks nú er verri en hún var í haust og í mörgum tilvikum séu aðstæður fólks mjög erfiðar. Þegar rýnt sé í stöðuna bendi flest til þess að öldurnar muni ekki lægja nema með nýjum kosningum.

Lýðræðisumbætur mikilvægar

,,Að því leyti tel ég að kosningaspurningin sé eitt brýnasta úrlausnarefni okkar nú og lýðræðismálin almennt. Það er full ástæða finnst mér, til að taka þar allar góðar hugmyndir upp á borðið. Lýðræðisumbætur hafa ávallt verið með mikilvægustu stefnumálum Samfylkingarinnar og því má flokkurinn ekki gleyma," segir varaformaðurinn.