Nokkur hundruð á Hróarskeldu

Hróaskelduhátíðin hefur verið vinsæl meðal rokkþyrstra Íslendinga sem hafa flykkst til Danaveldis í hundraða tali í byrjun júlí. Kreppan setur hins vegar strik í reikninginn í ár.

Aðeins hafa nokkur hundruð miðar selst hérlendis á hátíðina í ár. Þetta er mikil breyting frá því í fyrra þegar 860 miðar seldust.

„Þetta er mjög lítið miðað við síðustu ár en ég hef trú á að fólk ákveði þetta á síðustu stundu þegar aðstæður eru svona,“ segir Tómas Young, talsmaður hátíðarinnar, sem vildi þó ekki gefa upp nákvæma tölu. „Maður bjóst alveg við þessu fyrst miðinn er á þessu verði. Ef miðinn kostar 47.900 eins og í dag er eðlilegt að fólk sjá það eins og Everest, þótt þetta sé örugglega ódýrasta ferðin sem fólk getur farið í til útlanda því það þarf ekki að borga gistingu.“ Miðinn í fyrra var á bilinu 24 og 30 þúsund krónur og því hefur verðið næstum tvöfaldast vegna lágs gengis íslensku krónunnar.

Forsvarsmenn Hróarskelduhátíðarinnar íhuguðu að bjóða Íslendingum ókeypis ferðir á hátíðina en hættu við vegna mikils kostnaðar. „Hátíðin sá ekki hag sinn í því að kaupa 50 þúsund króna flugmiða til að selja 47 þúsund króna miða. Það er augljóst tap af því,“ segir Tómas.

Um 40 þúsund manns hafa keypt miða á hátíðina ár, sem er töluvert minna en í fyrra þegar um 75 þúsund manns sóttu hana heim. Hefur efnahagskreppunni verið kennt um þennan dvínandi áhuga.

Dagskrá hátíðarinnar lítur engu að síður glæsilega út því á meðal flytjenda eru Oasis, Coldplay, Kanye West, Fleet Foxes, Pete Doherty og Hjaltalín. - fb