King spilar aldrei aftur með Wigan

Dave Whelan, stjórnarformaður enska úrvalsdeildarfélagsins Wigan, segir að Marlon King muni aldrei aftur spila með félaginu.

King var dæmdur til átján mánaðar fangelsisvistar í dag eftir að hann var fundinn sekur um líkamsárás og kynferðislegt áreiti gagnvart ungri konu á skemmtistað í Lundúnum í desember í fyrra.

„Við erum nú að vinna í því að rifta samningi hans," sagði Whelan í samtali við enska fjölmiðla. „Þetta mál hefur valdið mér gríðarlega miklum vonbriðgum, svo ekki meira sé sagt."

King var á þessum tíma í láni hjá Hull City en Whelan segist ekki ætla að skella skuldinni á Hull. „Marlon King verður að taka fulla ábyrgð á eigin gjörðum í þessu máli."