Grunur um tvö svínaflensutilfelli í viðbót

Gert er ráð fyrir að niðurstöður rannsókna á sýnum vegna gruns um sex tilfelli inflúensu A (H1N1) liggi fyrir á morgun, mánudag. Viðkomandi einstaklingar tilheyra fjölskyldu mannsins sem greindist með inflúensuna fyrir helgi. Enginn viðkomandi er alvarlega veikur. Þetta kemur fram í tilkynningu frá sóttvarnalækni nú í dag. Það hafa því tvö tilfelli bæst við en í gær lék grunur á að fjórir fjölskyldumeðlimir mannsins hefðu smitast.

Þá segir í tilkynningunni að sóttvarnalæknir hafi haldið fund í morgun með almannavarnardeild og ríkislögreglustjóra. Þar kom meðal annars fram að áfram sé í gildi hættustig hér á landi samkvæmt viðbragðsáætlun um inflúensufaraldur. Ekki sé talin ástæða til að fra á neyðarstig þrátt fyrir að staðfest hafi verið að inflúensan sé komin til Íslands, enda sú veikindin væg.

„Tilkynningar um viðbúnað vegna inflúensunnar eru birtar á influensa.is, bæði á íslensku og ensku, og á almannavarnir.is. Þar er einnig að finna ýmsar upplýsingar um inflúensuna og ráðstafanir í því sambandi. Læknar og aðrir heilbrigðisstarfsmenn eru áfram hvattir til að senda sýni í greiningu á veirufræðideild Landspítalans frá sjúklingum með inflúensulík einkenni."

Þá segir að á morgun verði haldinn sameiginlegur fundur sóttvarnalækna og lögreglustjóra á landinu öllu í Reykjavík. Sóttvarnalæknir og almannavarnadeild boðuðu til fundarins fyrir nokkru til að fjalla um gildandi viðbragðsáætlanir vegna farsótta og hlutverk hvers og eins í því sambandi.

Samkvæmt upplýsingum Sóttvarnarstofnunar ESB voru í morgun staðfest tilfelli inflúensu A (H1N1) alls 12.433 í 46 ríkjum. Langflest tilfelli eru í Bandaríkjunum eða 6.552 en í þeirri tölu eru einnig líkleg flensutilfelli þar í landi.

Alls hefur 91 sjúklingur látist af völdum veikinnar, þar af 80 í Mexíkó. Níu hafa látist í Bandaríkjunum, einn í Kanada og einn í Kosta Ríka.