Bannað að beita börn refsingum

Alþingi samþykkti í morgun frumvarp Kolbrúnar Halldórsdóttur og félaga hennar úr Vinstri grænum um að óheimilt og refsivert verði að beita börn líkamlegum og andlegum refsingum. Kolbrún sagði í samtali við fréttastofu, þegar frumvarpið var tekið til annarar umræðu, að ástæðan fyrir frumvarpinu væri Hæstaréttardómur sem féll þar sem karlmaður var sýknaður af ákæru um að hafa rassskellt tvö börn sem voru þá sex ára og fjögurra ára.

Í dómnum segir að ekki sé lagt fortakslaust bann við því að foreldri eða annar maður með samþykki þess beiti barn líkamlegum aðgerðum til að bregðast við óþægð, heldur sé refsinæmi slíkrar háttsemi háð því að gerðir hans séu til þess fallnar að skaða barnið andlega eða líkamlega. Ekki hafi verið færðar sönnur fyrir að háttsemi ákærða hafi farið út fyrir þau mörk, sem þetta ákvæði feli í sér. Dómurinn var nokkuð umtalaður þegar að hann féll og var meðal annars gagnrýndur af Umboðsmanni barna.

Að frumkvæði Kolbrúnar hefur lögunum því verið breytt núna á þann hátt að börn ættu hvorki að þurfa að líða líkamlegar né andlegar refsingar.