Samfylkingin vildi sprengja stjórnarsamstarfið

Þorgerður Katrín Gunnarsdóttir varaformaður Sjálfstæðisflokksins segir málefnaágreining ekki hafa sprengt Ríkisstjórnina. Staðreyndin hafi verið sú að Samfylkingin hafi sífellt komið með auknar kröfur og á endanum hafi þær breytingar verið óaðgengilegar. Sjálfstæðisflokkurinn hafi haldið að Samfylkingin myndi nota evrópumálin sem ástæðu fyrir stjórnarslitum en það hafi ekki verið gert.

Þetta sagði Þorgerður í kvöldfréttum Ríkissjónvarpsins. Hún sagði ljóst að Samfylkingin hafi ætlað að sprengja stjórnarsamstarfið og þær þreifingar á milli hennar og Vinstri grænna í dag staðfesti það.

Þorgerður sagði samstarfið við Ingibjörgu Sólrúnu hafa verið gott en það sé ljóst að þegar hún hafi farið frá hafi staðan verið önnur enda sé Samfylkingin ósamstæður flokkur margra flokka.

Hún sagði kröfuna um að Davíð Odsson viki vera fyrirslátt. „Við verðum að átta okkur á því að hér hefur heilt bankakerfi og fjármálakerfið hrunið. Poppúlískar breytingar eru því ekki það sem við vildum sjá. Við vorum tilbúin með breytingar strax í febrúar sem gengu út á að byggja upp fjármálakerfið," sagði Þorgerður sem viðurkenndi að Davíð Oddsson væri umdeildur maður.

„Davíð Oddsson er samt ekki stóra breytan í þessu ," sagði Þorgerður.