Vilja jafnt kynjahlutfall í stjórnum fyrirtækja

Frumvarp fjögurra þingmanna Samfylkingarinnar um jafnt hlut kynjanna í stjórnunar- og áhrifastöðum fjármálafyrirtækja verður tekið til fyrstu umræðu í dag þegar Alþingi kemur saman að nýju eftir jólaleyfi. Frumvarpið sem var lagt fyrir í lok október á seinasta ári felur í sér að við stjórnarkjör skal tryggt að í stjórnum  skuli sitji sem næst jafnmargar konur og karlar.

Í ræðu Jóhönnu Sigurðardóttur, félagsmálaráðherra, á jafnréttisþingi í seinustu viku kom fram að hún telur að of hægt hafi miðað varðandi ráðningu kvenna í stjórnunarstöður hjá hinu opinbera og í atvinnurekstri og stjórn fyrirtækja. Jóhanna vill skoða af mikilli alvöru hvort stjórnvöld geti tekið fastar á málum og beitt róttækari aðgerðum.

Lagasetning skilaði ágætum árangri í Noregi

,,Atburðir síðustu vikna hafa sýnt að þörf er á nýrri nálgun og nýrri hugsun í stjórnun fjármálafyrirtækja hér á landi. Lengi hefur verið rætt um lögfestingu á jöfnun kynjahlutfalls í stjórnun fjármálafyrirtækja og um það verið skiptar skoðanir. Aðrar þjóðir, t.d. Norðmenn, hafa farið þá leið að lögfesta hlutfallið til að tryggja jafnræði kynja í stjórnum fjármálafyrirtækja," segir í greinargerð með frumvarpinu.

Á undanförnum árum hafi verið unnið að því að jafna kynjahlutföll í stjórnum opinberra hlutafélaga. Í greinargerðinni segir einnig að í nýlegum lögum um jafna stöðu og jafnan rétt kvenna og karla að við skipun í nefndir og stjórnir á vegum ríkis og sveitarfélaga skuli þess gætt að hlutfall kynjanna sé sem jafnast og ekki minna en 40% þegar um fleiri en þrjá fulltrúa er að ræða.

Reglan eigi við um öll fjármálafyrirtæki

Þingmennirnir telja nú þegar stærstu bankar landsins verða í aðaleigu ríkisins sé eðlilegt að reglan eigi við um öll fjármálafyrirtæki í landinu.

,,Ljóst er að fram til þessa hafa konur ekki átt greiðan aðgang að stjórnum banka eða fjármálafyrirtækja. Er það miður, ekki síst þar sem rannsóknir hafa sýnt fram á fjárhagslegan ávinning fyrirtækja af því að auka hlutfall kvenna í stjórnum. Hið sama á reyndar við um stjórnunarstöður og hlutdeild kvenna þar," segir í greingargerðinni.

Steinunn Valdís Óskarsdóttir er fyrsti flutningsmaður frumvarpsins en meðflutningsmenn eru Guðbjartur Hannesson, Ásta R. Jóhannesdóttir og Ellert B. Schram.