Samkeppniseftirlitið fór inn í Fóðurblönduna

Samkeppniseftirlitið gerði í morgun húsleit á skrifstofu Fóðurblöndunnar hf. í Reykjavík. Samkvæmt dómsúrskurði frá því í gær sem heimilaði húsleitina telur Samkeppniseftirlitið grun leika á að Fóðurblandan og Mjólkurfélag Reykjavíkur hafi viðhaft viðvarandi verðsamráð í andstöðu við samkeppnislög á fóðurmarkaði undanfarin þrjú ár. Einnig að Fóðurblandan ásamt öðrum keppinautum í áburðarsölu, þ.e. Sláturfélagi Suðurlands svf. og Skeljungi hf., hafi haft með sér verðsamráð á áburðarmarkaði síðastliðið ár.

Í yfirlýsingu frá Eyjólfi Sigurðssyni, framkvæmdastjóra Fóðurblöndunnar, segist hann vísa báðum framangreindum ávirðingum á bug, en fagni því að Samkeppniseftirlitið leiti af sér allan grun um viðskiptahætti þeirra félaga sem um ræði. Fóðurblandan vænti þess að rannsókn málsins verði hraðað, svo félagið þurfi ekki að sitja undir meintum ávirðingum Samkeppniseftirlitsins um lengri tíma.

Samkeppni á fóður- og áburðarmarkaði hafi verið mikil undanfarin ár og frekar vaxið en hitt. Markaðurinn sé hins vegar fákeppnimarkaður sem skili sér í einsleitum verðum þegar upp sé staðið, enda eru fyrirtæki á þessum mörkuðum að dæma sig út af markaðnum ef verð eru ekki samkeppnisfær.