Árni hyggst ekki segja af sér

Árni Mathiesen, fjármálaráðherra, ætlar ekki að segja af sér embætti í kjölfar álits umboðsmanns Alþingis um skipan Þorsteins Davíðssonar í dómarastöðu við Héraðsdóm Norðurlands eystra fyrir rúmu ári síðan.

,,Herra foresti, ég hef ekki hugsað mér að segja af mér vegna þessa," sagði Árni í svari við fyrirspurn Árna Þórs Sigurðssonar, þingmanns Vinstri grænna, á Alþingi fyrr í dag.

,,Það er ekki þolinmæði í samfélaginu gagnvart svona stjórnsýslusubbuskap ráðamanna," sagði Árni Þór. Augljóst væri að settur dómsmálaráðherra hafi farið á svig við stjórnsýslulög og misboðið siðferðiskennd almennings. Árni Þór fullyrti að aldrei hafi annað staðið til en að skipa Þorstein í embættið.