Þak sett á innheimtukostnað

Björgvin G. Sigurðsson viðskiptaráðherra hefur undirritað reglugerð um hámarksfjárhæð innheimtukostnaðar. Hingað til hefur ekki verið þak á þeirri upphæð sem innheimtufyrirtæki, til dæmis Intrum eða Momentum, hafa getað sett á innheimtu sína.

„Þetta er langþráður áfangi og þetta baráttuatriði ýmissa forvera minna næst loks í gegn. Það er sérstaklega mikilvægt í því árferði sem nú er. Það þekkja það margir að lágar skuldir detta í innheimtu og við það hafa tugir þúsunda bæst ofan á upphæðina. Nú er komið hámark á þessa upphæð,“ segir Björgvin. „Þetta er réttarbót fyrir neytendur og skjól gagnvart fólki.“

Samkvæmt reglugerðinni má aðeins taka 900 krónur fyrir skyldubundna innheimtuviðvörun frá innheimtuaðila, eftir gjalddaga kröfu. Mismunandi upphæðir má leggja á önnur milliinnheimtubréf; allt frá 1.250 krónum til 5.500 fyrir hærri kröfur.

Samkvæmt lögunum á skuldari rétt á að fá innheimtuviðvörun gegn vægu gjaldi eftir gjalddaga. Því má ekki lengur hefja löginnheimtu, til dæmis með greiðsluviðvörun með háum kostnaði, strax eftir að krafa er komin í vanskil.

Reglugerðin tekur gildi 1. febrúar.- kóp