Guðlaugur í formannsslag

Guðlaugur Þór Þórðarson, fyrrverandi heilbrigðisráðherra, hyggst bjóða sig fram til formanns í Sjálfstæðisflokknum á landsfundi flokksins sem fram fer dagana 26. til 29. mars í Laugardalshöll. Guðlaugur mun tilkynna um framboð sitt á morgun, samkvæmt heimildum fréttastofu.

Geir H. Haarde, formaður Sjálfstæðisflokksins, tilkynnti nýverið að hann hafi ekki hug á að sækjast eftir endurkjöri vegna veikinda. Eins og fram hefur komið í fréttum er Bjarni Benediktsson sá eini sem formlega hefur lýst því yfir að hann bjóði sig fram til formennsku í flokknum. Óljóst er hvort að Þorgerður Katrín Gunnarsdóttir bjóði sig einnig fram en hún hefur verið varaformaður flokksins frá 2005.

Þá hafa verið gerðar símakannanir til að kanna fylgi við Kristján Þór Júlíusson sem formann. Kristján segist ekki hafa gert þær kannanir en hann hefur samkvæmt heimildum fréttastofu verið að máta sig við formannsstólinn undanfarnar vikur.

Guðlaugur hefur setið á þingi síðan 2003. Hann sigraði Björn Bjarnason í prófkjöri sjálfstæðismanna um 2. sætið í Reykjavík fyrir seinustu þingkosningar. Guðlaugur var borgarfulltrúi á árunum 1998 til 2006.