Mótmælt fram á rauða nótt

Mótmælum við Alþingishúsið lauk ekki fyrr en á fjórða tímanum í nótt og höfðu þá tveir mótmælendur verið teknir úr umferð. Annar er að sofa úr sér ölvímu en hinum var sleppt undir morgun.

Eftir að mótmælendum hafði fækkað mjög undir kvöld fjölgaði aftur í liði þeirra í gærkvöldi og var þá kveikt bál fyrir utan Alþingishúsið. Mótmælendur drógu að eldsmat úr nágrenninu og var mikið neistaflug af bálinu. Meðal annars var Óslóartréð á Austurvelli fellt og dregið á köstinn. Talið er að á annað þúsund manns hafi þá verið á Austurvelli.

Hvorki lögregla né slökkvilið höfðust að fyrr en um klukkan tvö í nótt að lögregla fór að þoka mótmælendum frá bálkestinum og slökkviliðið slökkti í honum. Um klukkan þrjú var svo kveikt bál á Ingólfstorgi en slökkviliðið slökkti eldinn skömmu síðar. Upp úr því fækkaði ört í röðum mótmælenda.

Eftir því sem næst verður komist meiddist enginn alvarlega í mótmælunum í gær og fram á nótt, hvorki mótmælendur né lögreglumenn. Um það bil hundrað lögreglumenn voru að jafnaði á vakt á Austurvelli allan tímann og var fenginn liðsauki frá Keflavík um tíma. Sextíu til 70 mótmælendur komu saman á Ráðhústorginu á Akureyri til mótmæla í gærkvöldi og kveiktu þar í vörubrettum. Að öðru leyti fóru mótmælin friðsamlega fram og lauk þeim fyrir miðnætti.