Verne gæti þurft sex sinnum meiri orku

Orkuþörf fyrirhugaðs gagnavers Verne Holdings gæti orðið meiri en 140 MW, miðað við athugasemdir við fjárfestingarsamning ríkisins og fjögurra fyrirtækja, sem að framkvæmdinni standa.

Gagnaverið hefur verið til umræðu síðan á síðustu mánuðum ársins 2007. Þá var það kynnt sem 25 MW ver, sem gæti stækkað í 50 MW. Síðan hefur af og til verið rætt um 25 til 80 MW, en oftast um lægri töluna, 25 megavött.

Heimildarmaður blaðsins, sem kom að gerð fjárfestingarsamningsins, segir 140 megavatta orkuþörf þó í samræmi við fyrstu áætlanir. 25 megavöttin hafi verið nefnd sem orkuþörf fyrsta áfanga. En áfangarnir verði hugsanlega fjórir, gangi vel. Óvíst sé nákvæmlega hversu mikla orku þurfi fyrir hina áfangana. Það fari eftir pöntunum viðskiptavina og tækniframförum.

Verne hefur ekki tryggt sér orku umfram þessi títtnefndu 25 megavött. Þau skuldbatt Landsvirkjun sig til að selja fyrirtækinu með þeim fyrirvara að virkjað yrði í Þjórsá, eins og blaðið greindi frá í mars 2008. Það var skýrt með því að Landsvirkjun ætti ekki aðra virkjunarkosti en í Þjórsá.

Þrátt fyrir þetta segir heimildarmaður blaðsins að Verne hafi ekki áhyggjur af því að erfitt reynist að ná í meiri orku, jafnvel þótt álver í Helguvík verði að veruleika. Fyrirtækið telji sig vera framarlega í röðinni að orku, og slík stækkun gagnaversins verði ekki fyrr en árið 2016.

Spurður um verðið, segir hann að Landsvirkjun hafi haft frumkvæði að því að trúnaður ríki um það. Ísland sé ódýrari kostur fyrir slíka stóriðju en nágrannalöndin, en ekki ódýrasti kostur í heimi. Til að mynda sé hægt að fá betra orkuverð í norðvesturhluta Bandaríkjanna.

klemens@frettabladid.is