Össur á Al Jazeera

Sjónvarpsmaðurinn Sir David Frost sem nýverið gekk til liðs við Al Jazeera sjónvarpsstöðina ræddi við Össur Skarphéðinsson, utanríkis- og iðnaðarráðherra, í dag og verður viðtalinu sjónvarpað í kvöld. Össur mætti í myndver Stöðvar 2 í Skaftahlíð og ræddi við Frost í gegnum gervihnött.

Vel fór á með þeim Frost og Össuri sem ræddu um utanríkismál og stöðu Íslands í kjölfar bankahrunsins. Aðild Íslands að Evrópusambandinu hefði dregið úr falli íslenska bankakerfisins, að mati Össurar. Hann sagði fyrri ríkisstjórn hafa verið frjálshyggjuþenkjandi og að regluverk og eftirlit hafi verið að skornum skammti. Þá sagði Össur innviði hér á landi sterka til að takast á við uppbygginguna sem nú væri hafin. Heilbrigðis- og menntakerfi Íslendinga væri gott.

Frost hefur getið sér gott orð sem þáttastjórnandi. Hann starfaði lengi hjá BBC en hóf nýverið störf á Al Jazeera sjónvarpsstöðinni. Á ferli sínum hefur Frost rætt við fjölmarga þjóðarleiðtoga, þar af sjö Bandaríkjaforseta. Nýverið var frumsýnd kvikmynd byggð á frægu viðtali hans við Richard Nixon.

Viðtal Frosts við Össur verður sýnt í dag klukkan 19 að íslenskum tíma og endursýnt þrívegis um helgina.

Heimasíða Al Jazeera