Orkuveitan vinnur að hreinsun hveralyktar

Orkuveita Reykjavíkur hefur unnið að því um hríð að hefja hreinsun hveralyktar úr gufunni, sem kemur frá virkjun fyrirtækisins á Hellisheiði. Lyktinni veldur brennisteinsvetni og í vor mun hefjast blöndun þess við niðurrennslisvatn frá virkjuninni, þannig að því verður veitt niður í jarðhitageyminn, þaðan sem það kom upphaflega. Þetta kemur fram í tilkynningu frá Orkuveitunni.

„Orkuveita Reykjavíkur fagnar því að sífellt betur er fylgst með styrk hveralyktarinnar og á fyrirtækið þátt í auknum og útbreiddari mælingum. Hinn langvinni kafli hægra austanátta í talsverðum frostum olli hinum háa styrk síðustu daga. Slíkar aðstæður eru fremur fátíðar," segir í tilkynningunni.