Þjóðverjar styrkja Mæðrastyrksnefnd

Hópur Þjóðverja sem tapaði hundruðum milljóna króna á hruni íslensku bankanna afhenti í dag Mæðrastyrknefnd Reykjavíkur peningagjöf til að aðstoða Íslendinga í neyð.

Þjóðverjarnir áttu allir innlánsreikninga hjá Kaupþing Edge þegar bankarnir hrundu í október á síðasta ári. Sumir þeirra áttu hundruð milljónir króna á reikningum sínum. Þeir eru staddir hér á landi til að ræða við íslensk stjónvöld um reikningana og funduð í dag meðal annars með viðskiptaráðherra vegna málsins. Eftir þann fund fóru þeir til Mæðrastyrksnefndar Reykjavíkur. Einn úr hópnum, Karchenez Bellmann, kom hingað í nóvember á síðasta ári vegna málsins og ákvað þá að koma aftur og reyna þá að láta gott af sér leiða.

Þjóðverjarnir gáfu Mæðrastyrksnefnd eitt þúsund evrur, eða tæplega hundrað og fimmtíu þúsund krónur, og sælgæti. Bellmann segir Þjóðverja almennt hafa mikla samúð með Íslendingum og þeim erfiðleikum sem blasa við.