Útlit fyrir að aðildarviðræður verði samþykktar með 35 atkvæðum

Útlit fyrir að aðildarviðræður verði samþykktar með 35 atkvæðum

Útlit er fyrir að þingsályktunartillaga um aðild að Evrópusambandinu verði samþykkt með 35 greiddum atkvæðum á Alþingi. Fimm þingmenn Vinstri grænna, þar af einn ráðherra, munu greiða atkvæði gegn tillögunni.

Atkvæðagreiðsla um þingsályktunartillögu ríkisstjórnarinnar um aðildarumsókn að Evrópusambandinu fer í fyrsta lagi fram á Alþingi á mánudag og sennilega ekki fyrr en á þriðjudag. Byrjað verður að greiða atkvæði um tvær breytingartillögur annars vegar frá Sjálfstæðisflokki og hins vegar frá Framsóknarflokki. Þótt einhverjir þingmenn Vinstri grænna greiði tillögu Sjálfstæðismanna um tvöfalda atkvæðagreiðslu atkvæði sitt er líklegt að báðar breytingartillögurnar verði felldar.

Þá kemur að því að greiða atkvæði um sjálfa þingsályktunartillöguna. Ekki þarf að velta því fyrir sér hvernig þingmenn Samfylkingarinnar greiða atkvæði, þeir munu allir samþiggja tillöguna. Aftur á móti má reikna með að allir 16 þingmenn Sjálfstæðisflokksins muni greiða atkvæði gegn tillögunni, en það er þó alls ekki öruggt. Ragnheiður Ríkharðsdóttir er líkleg til að sitja hjá eða greiða tillögunni atkvæði sitt. Þá má reikna með að allir þingmenn Borgarahreyfingarinnar geri það einnig, miðað við yfirlýsingar þeirra í upphafi máls og í umræðunni.

Eftir að hafa rætt við fjölmarga þingmenn og áhrifafólk í Vinstri grænum telur fréttastofan líklegt að níu af fjórtán þingmönnum Vinstri grænna veiti tillögunni brautargengi, þau Álfheiður Ingadóttir, Árni Þór Sigurðsson, Björn Valur Gíslason, Guðfríður Lilja Grétarsdóttir, Katrín Jakobsdóttir, Lilja Mósesdóttir, Steingrímur J. Sigfússon, Svandís Svavarsdóttir og Ögmundur Jónasson. Fimm þingmenn flokksins, þar af einn ráðherra, muni hins vegar greiða atkvæði gegn tillögunni; eða þau Ásmundur Einar Daðason, Atli Gíslason, Lilja Rafney Magnúsdóttir, Jón Bjarnason sjávar- og landbúnaðarráðherra og Þuríður Backman.

Tveir þingmenn Framsóknarflokksins, þau Guðmundur Steingrímsson og Siv Friðleifsdóttir hafa lýst yfir stuðningi við tillöguna. Birkir Jón Jónsson hefur verið jákvæður út í aðildarumsókn en ekki er ljóst hvað hann mun gera. Aðrir þingmenn Framsóknarflokksins með Sigmund Davíð Gunnlaugsson formann flokksins í broddi fylkingar, munu væntanlega allir greiða atkvæði gegn aðildarumsókninni.

Verði þetta niðurstaðan verður aðildarumsóknin samþykkt með 35 atkvæðum gegn 28, en þetta er auðvitað sagt með þeim fyrirvara að málið er ekki afgreitt fyrr en til atkvæðagreiðslunnar kemur og nokkrir dagar í pólitík eru langur tími.