Á fjórtánda þúsund atvinnulausir

Atvinnulausum heldur áfram að fjölga og á vef Vinnumálastofnunar eru nú 13.688 skráðir atvinnulausir. Í lok síðasta árs voru 8982 skráðir án atvinnu og hefur þeim því fjölgað um 4700 á rúmum mánuði.

8649 karlar eru skráðir án atvinnu og 5039 konur. Atvinnuleysið er mest á höfuðborgarsvæðinu en þar eru tæplega 8800 atvinnulausir.

Ef litið er á allar tilkynntar hópuppsagnir sem borist hafa síðustu mánuði og koma til framkvæmda á árinu 2009 má sjá að flestir missa vinnu nú í febrúar eða yfir 1100 manns. Tæplega 500 manns missa vinnuna í byrjun mars, ríflega 200 í byrjun apríl og um 100 manns í maí.