Ljósin á Oslóartrénu tendruð á Austurvelli

Ljósin á Oslóartrénu á Austurvelli verða tendruð klukkan fjögur í dag. Athöfnin hefst með því að Dómkórinn syngur nokkur lög undir stjórn Marteins Hunger Friðrikssonar.

Margit F. Tveiten, norski sendiherrann flytur stutt ávarp. Þá tekur borgarstjórinn í Reykjavík, Hanna Birna Kristjánsdóttir, við trénu sem er gjöf Oslóarborgar til Reykvíkinga. Það er Aud Kvalbein, varaborgarstjóri Oslóarborgar sem afhendir tréð, en það var höggvið 16. nóvember og sent til Íslands. Það verður svo norsk-íslensk stúlka, Hrafnhildur Sif Ingólfsdóttir, 8 ára, sem tendrar jólaljósin á trénu.

Tréð verður að venju fagurskreytt ljósum en að auki mun Ketkrókur, jólaórói Styrktarfélags lamaðra og fatlaðra 2009 prýða tréð. Ketkrókur er fjórði óróinn í jólasveinaseríu Styrktarfélagsins en fyrri óróar félagsins hafa prýtt tréð síðustu ár. Hrafnkell Birgisson hefur hannað óróann sem verður seldur í verslunum um land allt 5.-19. desember.

Gerður Kristný mun flytja frumsamið ljóð um Ketkrók. Þá koma Bangsi litli úr Dýrunum í Hálsaskógi og Ljónið úr Galdrakarlinum í Oz í heimsókn og fá viðstadda til að hugsa um hvað það er sem skiptir máli.

Að lokum koma þrír hressir jólasveinar sem hafa laumast til byggða og ætla að heilsa upp á krakkana á Austurvelli ef mamma þeirra verður ekki búinn að ná þeim.

Dagskránni lýkur um 16:45. Gerður G. Bjarklind er kynnir og dagskráin er öll túlkuð á táknmál.