Sigurjón Þ. hættur kennslu í HR

Sigurjón Þ. Árnason, fyrrum bankastjóri Landsbankans, kemur ekki til með að kenna við Háskólann í Reykjavík á komandi vetri. Eftir hrun hóf hann þar kennslu í ákveðnu námskeiði í verkfræði, en samkvæmt Jóhanni Hlíðari Harðarsyni, upplýsingafulltrúa Háskólans, stóð aldrei til að hann kenndi meira.

„Hann var aldrei fastur starfsmaður við HR heldur stundakennari eins og hátt á annað hundrað manna úr atvinnulífinu sem koma inn í stundakennslu við HR á hverju ári," segir í svari Jóhanns við fyrirspurn fréttastofu.