Kærasta Robba braut Evrópubikarinn

„Jú, jú, þetta er rétt, það er samt búið að laga hann núna,“ segir Róbert Gunnarsson, einn af hinum ástsælu silfurdrengjum og leikmaður Gummersbach í Þýskalandi.

Þýska blaðið Der Bild birti nýverið mynd af verðandi eiginkonu Róberts, Svölu Sigurðardóttur, þar sem hún stóð með brotinn EHF-Evrópubikar. Róbert vann hann með liði sínu á mánudaginn þegar Gummersbach lagði slóvenska liðið Gorenje Velenje í Köln.

Róbert viðurkennir að þetta hafi verið svolítið skondið atvik og honum þótti ekkert síður fyndið að þýska stórblaðið skyldi birta myndina af unnustunni með brotna bikarinn.

„Það er svona lok á bikarnum sem er alltaf að detta af og ofan á því er merki EHF og það brotnaði. Ekkert stórmál svo sem og kannski orðum aukið að hún hafi brotið sjálfan bikarinn,“ segir Róbert og bendir á að það hafi örugglega um þrjú hundruð fílefldir karlmenn með stórar og miklar handboltalúkur handleikið þennan bikar og misst umrætt lok í gólfið.

Svala hafi hins vegar bara verið svo óheppin að merkið skyldi brotna þegar það gerðist hjá henni „En þessu var að sjálfsögðu klínt á hana,“ segir Róbert og hlær og bætir því við að öllum hafi þótt þetta bara nokkuð skemmtilegt.

„Það hlógu í það minnsta allir að þessu.“

Langþráð sumarfrí er fram undan sem Róbert hyggst nýta til góðra verka. Hann og bikarbrjóturinn Svala eru nefnilega að fara að gifta sig í júní þótt línumaðurinn harðskeytti vilji sem minnst um þá veislu tala.

freyrgigja@frettabladid.is