Kemur ekki til greina að greiða atkvæði með bónusgreiðslum

Formaður stjórnar lífeyrissjóðs verslunarmanna segir að lífeyrissjóðurinn muni aldrei greiða atkvæði með áætlun Straums um milljarða bónusgreiðslur til starfsmanna bankans, hún sé andsnúin hugmyndum sjóðsins. Ef áætlunin gengur eftir fær hver starfsmaður Straums 3,7 milljónir í bónusgreiðslu á mánuði næstu fimm árin.

Straumur fjárfestingarbanki, sem tekinn var yfir af Fjármálaeftirlitinu, hefur að undanförnu unnið að því að ná samkomulagi við kröfuhafa um áframhaldandi starfsemi.

Í rekstraráætlun sem kynnt var fyrir kröfuhöfum í byrjun ágúst, er áætlun um að starfsmenn Straums fái bónusgreiðslur í samræmi við endurheimtur á eignum bankans á næstu fimm árum. Allt að 10 milljarða króna. Það gerir 3,7 milljónir í bónusgreiðslu á mánuði á mann.

Þess ber að geta að tillagan er ósamþykkt, en kemur til umræðu nýrrar stjórnar bankans að lokinni endurskipulagningu.

Lífeyrissjóðir eiga 24 milljarða króna kröfu á bankann og því mikilla hagsmuna að gæta. Eiríkur Jónsson, formaður Lífeyrissjóðs starfsmanna ríkisins sagði í hádegisfréttum okkar í dag að það að tala um bónusgreiðslur sem telja í milljörðum væri eins og blaut tuska framan í þjóðina. Semja eigi um laun sem séu samboðin fólkinu í landinu.

Stjórn LSR mun koma saman í næstu viku þar sem málið verður rætt.

Ragnar Önundarson, formaður stjórnar lífeyrissjóðs verslunarmanna, sagði í samtali við fréttastofu í dag að bónusgreiðslurnar væru algjörlega andsnúnar hugmyndum lífeyrissjóðsins og sjóðurinn muni greiða atkvæði gegn þessari áætlun.

Gera má ráð fyrir að afstaða erlendra kröfuhafa ráði niðurstöðunni á endanum, þar sem erlendar kröfur eru umfangsmeiri en innlendar hjá Straumi.