Hafa skilað ársreikningum fyrir 2007

Sjálfstæðisflokkurinn og Framsóknarflokkurinn hafa skilað ársreikningum sínum fyrir árið 2007 til Ríkisendurskoðunar. Nú hafa allir flokkar skilað inn reikningum og verða upplýsingar úr þeim birtar opinberlega að öllum líkindum síðar í mánuðinum.

Lög um fjármál stjórnmálaflokka og frambjóðendur tóku gildi 1. janúar 2007. Þau fela meðal annars í sér að stjórnmálaflokkum er skylt að skila ársreikningum sínum til embættis Ríkisendurskoðunar. Það hefur ekki verið gert áður og standa vonir standa til þess að þegar komin verður reynsla á ferlið muni reikningar flokkanna berast embættinu fyrr.

Frestur til að skila inn reikningunum var þrívegis framlengdur, seinast til 1. október 2008. Íslandshreyfingin skilaði fyrstur flokka ársreikningum sínum í júlí á seinasta ári. Því næst skiluðu Samfylkingin og Vinstri grænir sínum reikningum og um áramótin barst embættinu ársreikningar Frjálslynda flokksins.

Lárus Ögmundsson, skrifstofustjóri hjá Ríkisendurskoðun, segir að Sjálfstæðisflokkurinn hafi skilaði sínum gögnum um miðjan febrúar og þá hafi reikningar Framsóknarflokksins borist embættinu í gær.

Birtar verða opinberlega samandregnar upplýsingar úr reikningunum. ,,Ég á von á því að okkur takist að birta þetta fyrir lok mánaðarins," segir Lárus.